Met í stökki á vélhjóli bætt um sjö metra um síðustu helgi

Stökk 34 metra í Njarðvíkurhöfn

Njarðvík.
„ÞETTA var rosaleg tilfinning og eitthvað það æðislegasta sem ég hef gert," sagði Jóhannes Sveinbjörnsson ofurhugi úr Njarðvík eftir að hann hafði stokkið 34 metra á vélhjóli sínu í Njarðvíkurhöfn á sunnudagskvöldið. „Ætlunin var að slá metið sem Árni Kópsson setti þegar hann stökk 27 metra í Reykjavíkurhöfn og það tókst," sagði Jóhannes ennfremur. 

Jóhannes, sem er 21 árs, og aðstoðarmenn hans höfðu ekki auglýst þetta uppátæki en engu að síður var talsverður fjöldi áhorfenda sem kom til að fylgjast með stökkinu sem hafði spurst út. 

Það var svo um hálf níu sem Jóhannes settist á vélfák sinn, sem er Yamaha 175 árgerð 1982, og geystist af stað. Stökkið var tilkomumikið og allt fór vel en það tók kafara nokkurn tíma að finna hjólið því djúpt er í höfninni og skyggni var orðið takmarkað. - BB  

Morgunblaðið 15.9.1993